Հայաստանի անցումը ԱՄՆ-ի և ՆԱՏՕ-ի «հովանոցի» ներքո անհնարին կդարձնի Ռուսաստանի Դաշնության հետ և ՀԱՊԿ-ի շրջանակներում միասնական պաշտպանական տարածքի պահպանումը։ Այս մասին ՌԴ փոխարտգործնախարար Միխայիլ Գալուզինը հայտարարել է «Կոմսոմոլսկայա պրավդա»-ին։ Հարցազրույցի ամբողջական տեքստը հրապարակվել է ՌԴ ԱԳՆ կայքում։

«Անվտանգության ոլորտում Հայաստանի ինքնիշխանության հետագա կործանումը և ԱՄՆ-ի ու ՆԱՏՕ-ի «թղթե հովանոցի» տակ արևմտյան նմուշներին անցումը ուղղակի անհնարին կդարձնի Ռուսաստանի հետ և ՀԱՊԿ-ի շրջանակներում միասնական պաշտպանական տարածքի պահպանումը»,- ասել է նա։ 

Ինչպես նշել է ՌԴ ԱԳ փոխնախարարը, արևմտյան նարատիվների ազդեցության տակ տեղի է ունեցել երկկողմ քաղաքական շփումների կտրուկ նեղացում։

«Երևանից գնալով ավելի հաճախակի են լսվում անհիմն քննադատություններ Ռուսաստանի, ՀԱՊԿ-ի և գոյություն ունեցող անվտանգության համակարգի հասցեին: Դա, նվազագույնը, ոչ կառուցողական է և անհեռատես»,- կարծում է Գալուզինը։

Նրա կարծիքով՝ Երևանի լիարժեք մասնակցությունը ՀԱՊԿ-ի աշխատանքներին համապատասխանում է հայ ժողովրդի ակնկալիքներին և ծառայում է Հարավային Կովկասում խաղաղության ու կայունության պահպանման գործին։

«Ինչ էլ խոստանան արևմտյանները, որոնք դրդեցին Հայաստանի իշխանություններին «սառեցնել» մասնակցությունը Կազմակերպությանը, ՀԱՊԿ-ին, որպես Հայաստանի անվտանգության ապահովման մեխանիզմ, այսօր գործուն այլընտրանքներ չկան»,- վստահ է ռուս դիվանագետը։

ՀԱՊԿ-ի պոտենցիալի ավելացման ուղղությամբ աշխատանքները պլանաչափորեն առաջ են շարժվում՝ Երևանը թողնելով հետևում, հայտարարել է ռուս փոխնախարարը։

Ինչպես նշել է ռուս դիվանագետը, Մոսկվան բազմիցս և տարբեր մակարդակներով հստակորեն հայտնել է Երևանին անհանգստացնող հարցերը քննարկելու իր պատրաստակամությունը։

«Ընդգծել ենք, որ Մոսկվան եղել և մնում է հավատարիմ համալիր համաձայնագրերին ինչպես երկկողմ մակարդակով, այնպես էլ ընդհանուր ինտեգրացիոն կառույցների շրջանակում, չի հրաժարվել իր դաշնակիցների հանդեպ ստանձնած պարտավորություններից: Սակայն մեր տարբեր նախաձեռնություններին արձագանք այդպես էլ չենք ստացել»,- ասել է ՌԴ ԱԳ փոխնախարարը:

Նրա խոսքով՝ Մոսկվան հույս ունի, որ «Հայաստանի ղեկավարությունը կունենա բավականաչափ քաղաքական իմաստություն՝ հասկանալու Արևմուտքի խոստումների պատրանքայնությունը, Ռուսաստանի հետ հարաբերությունների ծայրահեղ կարևորությունը՝ հանրապետության ինքնիշխանության, անվտանգության և տնտեսական զարգացման տեսակետից»: